مظفر نگر میں رانا ہاؤس اور شاہ ٹائمز کے دفتر پر ای ڈی کی کارروائی

نئی دہلی (ایجنسی /ایف ای نیوز)اتر پردیش کے مظفر نگر میں انفورسمنٹ ڈائریکٹوریٹ (ED) نے پیر، 24 اگست کو معروف رانا ہاؤس اور سابق ایم ایل اے شاہنواز رانا سے وابستہ شاہ ٹائمز کے دفتر پر چھاپہ مارا۔ رانا ہاؤس میں سابق رکن پارلیمنٹ قادر رانا، سابق ایم ایل اے نور سلیم رانا اور سابق ایم ایل اے شاہنواز رانا کے خاندان کے افراد رہتے ہیں۔ موصولہ اطلاعات کے مطابق ای ڈی کی کارروائی کے دوران گھر کے باہر مقامی پولیس کے ساتھ سی آر پی ایف کے جوان بھی تعینات رہے۔چھاپے کے دوران رانا ہاؤس کو حفاظتی حصار میں لے لیا گیا اور باہر سے کسی شخص کو اندر جانے یا اندر موجود افراد کو باہر آنے کی اجازت نہیں دی گئی۔اسی دوران ای ڈی کی ایک ٹیم نے شاہنواز رانا سے وابستہ شاہ ٹائمز کے دفتر میں بھی تفتیش کی۔ ای ڈی کے اہلکاروں نے وہاں موجود دستاویزات اور ریکارڈ کی جانچ کی۔ابتدائی طور پر ای ڈی کی کارروائی کی وجہ اور کن الزامات کے تحت یہ چھاپے مارے گئے، اس بارے میں سرکاری طور پر تفصیلی معلومات سامنے نہیں آئی تھیں۔ تاہم، بعد کی اطلاعات کے مطابق یہ کارروائی مبینہ جعلی ان پٹ ٹیکس کریڈٹ (ITC) اور تقریباً 20 کروڑ روپے کی ٹیکس بے ضابطگیوں سے متعلق تحقیقات کا حصہ تھی۔ کارروائی کے دوران مختلف مقامات سے 3.60 کروڑ روپے نقدی، دستاویزات اور ڈیجیٹل آلات بھی برآمد کیے گئے۔