یوپی:معصوم کی پٹخ پٹخ کرجان لینے کے مجرم وراج کوعدالت سےسزائےموت

نئی دہلی (ایجنسی /ایف ای بی )یوپی کے فیروز آباد کی ایک عدالت نے 18 ماہ کے آرو کے بہیمانہ قتل کے الزام میں ویراج عرف جتیندر پاٹھک کو موت کی سزا سنائی ہے۔ ملزم نے صرف 27 سیکنڈ کے اندربچے کو آٹھ بار زمین پر پٹخ کر قتل کر دیا تھا۔جمعہ کو، ڈسٹرکٹ جج ڈاکٹر ببو سارنگ کی عدالت نے وراج (عرف جتیندر پاٹھک) کو – جو شیخو پور، سول لائنز، بدایون کا رہنے والا تھا، کو موت کی سزا سنائی۔ اس پر 30 مئی کو شکوہ آباد، فیروز آباد کی یادو کالونی میں دن دہاڑے 18 ماہ کے آرو کے بہیمانہ قتل کا الزام تھا، بچے کو آٹھ بار سڑک پرپٹخ کر جان سے مار دیا گیا تھا۔ اسے گزشتہ روز جمعرات کو اسے اس جرم میں سزا سنائی گئی تھی۔ سزا سن کر ویراج روپڑا۔ پولیس ویراج کو تقریباً 2:30 بجے جیل سے عدالت لائی تھی۔ استغاثہ اور دفاع دونوں کی موجودگی میں عدالت نے ملزم کو بچے کے قتل کا مجرم قرار دیا۔ عدالت نے کہا کہ استغاثہ کی جانب سے پیش کیے گئے شواہد حتمی تھے اور جرم انتہائی گھناؤنا تھا۔ سزا کا اعلان ہونے کے بعد، پولیس وراج کو واپس جیل لے گئی۔ اس کے چہرے پرسزا کا خوف صاف جھلک رہا تھا۔ اس دوران متوفی آرو کی نانی پنکی دیوی بھی وہاں موجود تھیں اور انہوں نے فیصلے پر اطمینان کا اظہار کیا۔
واضح رہے کہ شکوہ آباد کی یادو کالونی میں 30 مئی کی دوپہر کو، ویراج نے اپنی رشتے کی بھابھی رتی سے شادی کی ضد پوری نہ ہونے پر اس کے 18 ماہ کے بیٹے آرو کو سڑک پر پٹخ پٹخ کربے دردی سے مار ڈالا تھا۔ یہ سارا واقعہ سی سی ٹی وی کیمروں میں قید ہوگیا تھا۔ پولیس نے ملزم کو اسی رات دیر گئے ایک انکاؤنٹرکے بعد گرفتارکر لیا، جس کے دوران اسے دونوں ٹانگوں پر گولی لگنے سے زخم آئے۔ رتی دیوی، جو اصل میں آراون کی رہنے والی ہیں، نے فروری 2024 میں بدایوں کے سمیت کمار سے شادی کی تھی۔ وہ اپنے شوہر کے ساتھ جھگڑے کی وجہ سے پانچ ماہ سے اپنے میکے میں رہ رہی تھی ۔ اس صورت حال کا فائدہ اٹھاتے ہوئے، سمیت کے کزن ویراج ( شیکھو پور، بداون کے رہنے والے) جسے جتیندر پاٹھک کے نام سے بھی جانا جاتا ہے ، نے رتی کی مدد کرنے کی پیشکش کرکے اس کا اعتماد جیتنا شروع کیا۔ اس کے بعد اس نے اسے شادی کی پیشکش کردی، لیکن اس نے اس تجویز کو ٹھکرا دیا۔30 مئی کو رتی اپنی ماں پنکی دیوی کے ساتھ قانونی مشورہ لینے کے لیے شکوہ آباد آئی تھی۔ ملزم ویراج بھی وہاں پہنچ گیا۔ وہ معصوم آرو کو ٹافی خریدنے کے بہانے باہر لے گیا۔ گھر سے 50 میٹر کے فاصلے پر ایک سنسان سڑک پر، اس نے 27 سیکنڈ کے وقفے میں آٹھ باربچے کواس بے دردی سے پکی سڑک پر پٹخا جس سے بچے کی موت ہوگئی ،بچے کی موت کے بعد لاش دہلیز پر پھینک کر فرار ہو گیا۔