نئی دہلی/رانچی، (ایجنسی /ایف ای نیوز): جھارکھنڈ میں سرکاری بھرتی کے امتحانات میں مبینہ بے ضابطگیوں کے خلاف 10 اگست کو اسمبلی کی جانب نکالے گئے احتجاجی مارچ کے معاملے میں پولیس نے تقریباً 300 نامعلوم افراد کے خلاف ایف آئی آر درج کی ہے۔ پولیس کے مطابق مقدمہ امتناعی احکامات کی خلاف ورزی، سرکاری املاک کو نقصان پہنچانے اور ڈیوٹی پر موجود پولیس اہلکاروں و مجسٹریٹس پر حملہ کرنے کے الزامات میں درج کیا گیا ہے۔
رانچی کے پولیس سپرنٹنڈنٹ سٹی پارس رانا نے پی ٹی آئی کو بتایا کہ اسمبلی پولیس اسٹیشن میں 300 نامعلوم افراد کے خلاف مقدمہ درج کیا گیا ہے۔ تاہم، بتایا گیا ہے کہ ایف آئی آر کی اصل کاپی میں مبینہ ملزمان کی تعداد واضح طور پر درج نہیں ہے۔
ایف آئی آر کے مطابق، اسمبلی کی جانب احتجاجی مارچ اس وقت کشیدہ صورت اختیار کر گیا جب طلبہ کی تحریک کی آڑ میں احتجاج کرنے والے بعض افراد کی سکیورٹی فورسز سے جھڑپ ہوگئی۔ پولیس کا الزام ہے کہ مظاہرین نے سرکاری املاک کو نقصان پہنچایا اور ڈیوٹی پر تعینات پولیس اہلکاروں اور مجسٹریٹس پر حملہ کیا، جس کے نتیجے میں متعدد اہلکار زخمی ہوئے۔
پولیس کے مطابق پرانی اسمبلی سے نئی ودھان سبھا کی عمارت کی جانب بڑھنے والا طلبہ کا ایک بڑا ہجوم مبینہ طور پر ابتدائی حفاظتی گیٹ اور انتظامیہ کی جانب سے لگائی گئی رکاوٹیں عبور کرکے تقریباً 12 بج کر 15 منٹ پر نیلادری بھون کے قریب پہنچ گیا۔موقع پر موجود مجسٹریٹ، ناگری سرکل کے ریونیو سب انسپکٹر نے پبلک ایڈریس سسٹم کے ذریعے مظاہرین کو منتشر ہونے کی اپیل کی۔ انہیں بتایا گیا کہ اسمبلی اجلاس کے دوران بھارتیہ شہری سرکشا سنہتا (BNSS) کی دفعہ 163 کے تحت امتناعی احکامات نافذ ہیں۔ پولیس کا کہنا ہے کہ انتباہ کے باوجود کچھ مظاہرین نے پولیس کے ساتھ جھڑپ کی اور یوگوڈا ستسنگ کے قریب لگائی گئی رکاوٹیں ہٹا دیں۔ صورتحال مزید کشیدہ ہونے پر مبینہ طور پر مجسٹریٹس اور پولیس اہلکاروں پر چپلوں، جوتوں، پانی کی بوتلوں اور پتھروں سے حملہ کیا گیا۔ پتھراؤ میں کئی پولیس اہلکار زخمی ہوئے۔ ٹرینی کانسٹیبل فالگنی یادو کے سر پر بھی چوٹیں آئیں، جس کے بعد انہیں دیگر زخمی اہلکاروں کے ساتھ فوری طبی امداد کے لیے اسپتال منتقل کیا گیا۔
دوسری جانب طلبہ کے ترجمان پیوش کمار سنگھ نے کہا ہے کہ ایف آئی آر کو حقیقی طلبہ کو ہراساں کرنے کے لیے استعمال نہیں کیا جانا چاہیے۔ ان کا کہنا تھا کہ احتجاج میں شامل کسی بھی حقیقی طالب علم کو بلاوجہ نشانہ نہیں بنایا جانا چاہیے۔
Leave a Reply