شاہجہاں پورمیں 2 سادھوؤں کا بے رحمی سے قتل

نئی دہلی : (ایجنسی/ایف ای نیوز ) اتر پردیش کے شاہجہاں پور میں واقع شیو مندر کے اندر دو سادھوؤں (راہبوں) کا بے رحمی سے قتل کر دیا گیا۔ اس کے بعد، ان کی لاشوں کو مندر کے احاطے میں ہی لکڑیوں کی چتا پر نذرِ آتش کر دیا گیا۔ بتایا جاتا ہے کہ جمعرات کی صبح 7 بجے، گاؤں والوں نے مندر سے دھواں اٹھتے دیکھا تو وہ موقع پر پہنچے۔ وہاں پہنچنے پر انہوں نے دیکھا کہ ایک سادھو کی لاش جل رہی تھی، جبکہ دوسرے کی لاش جل کر محض ڈھانچے میں تبدیل ہو چکی تھی۔ دونوں لاشیں ایک دوسرے سے تقریباً 10 میٹر کے فاصلے پر پڑی تھیں۔ یہ واقعہ ضلع ہیڈ کوارٹر سے 70 کلومیٹر دور واقع خدا گنج میں پیش آیا۔سادھوؤں کی شناخت گوپال داس اور بہاری داس کے طور پر ہوئی ہے، دونوں خدا گنج کے سوتھا گاؤں میں واقع اسی مندر میں رہائش پذیر تھے۔این ڈی ٹی وی کی خبر کے مطابق شاہجہاں پور کے سپرنٹنڈنٹ آف پولیس (ایس پی) سوربھ دکشت نے بیان جاری کرتے ہوئے کہا، "صبح تقریباً 7 بجے پولیس کو اطلاع ملی کہ دو سادھوؤں کی جلی ہوئی لاشیں ملی ہیں۔ واقعے کا نوٹس لیتے ہوئے مقامی پولیس کے اعلیٰ افسران اور فرانزک ٹیم جائے وقوعہ پر پہنچی اور تفتیش شروع کی۔”ایس پی نے مزید کہا، "گاؤں کے رہائشی شیو کمار نے شکایت درج کرائی ہے کہ سُمیت نامی ایک مقامی نوجوان حال ہی میں ضمانت پر جیل سے رہا ہوا تھا۔ گزشتہ چند دنوں سے سُمیت ان سادھوؤں کے ساتھ وقت گزارنے لگا تھا۔”موصولہ اطلاعات کے مطابق، اس واقعے میں ہلاک ہونے والے دونوں سادھو مندر کے اندر ہی رہتے تھے۔ ایس پی سوربھ دکشت نے مزید بتایا، "گاؤں والوں کا کہنا ہے کہ اس (سُمیت) نے دونوں سادھوؤں سے وہ جگہ چھوڑنے کو کہا تھا، کیونکہ وہ وہاں رہنا چاہتا تھا اور اس جگہ پر اپنا اختیار قائم کرنا چاہتا تھا۔ اسی تنازعے کے نتیجے میں یہ واقعہ پیش آیا۔
شاہجہاں پور کے ایس پی نے مزید کہا، "موقعِ واردات سے تمام شواہد اکٹھے کر لیے گئے ہیں۔ لاشوں کو پوسٹ مارٹم کے لیے بھیج دیا گیا ہے۔ نامزد ملزم سمت کے خلاف متعلقہ دفعات کے تحت مقدمہ درج کیا جا رہا ہے۔ مرکزی ملزم سمت کو حراست میں لے لیا گیا ہے اور اس سے تفتیش کی جا رہی ہے۔ واقعے کے بارے میں جمع کی گئی معلومات اور شواہد کی بنیاد پر مزید کارروائی کی جائے گی۔”