منریگا کوئی خیراتی ادارہ نہیں، یہ غریبوں اور مزدوروں کا حق ہے: ضیاء الرحمن

بلند شہر (ایف ای بی) انڈین نیشنل کانگریس کی ملک گیر ’’منریگا بچاؤ‘‘مہم کے ایک حصے کے طور پر ضلع کانگریس کمیٹی بلند شہر کے کارکنوں اور رہنماؤں نے ضلع صدر ضیاء الرحمن کی قیادت میں گاندھی مجسمے کے سامنے ملکا پارک میں ایک دن کا اپواس کیا۔ کانگریسیوں نے منریگا کو بچانے کی لڑائی کو ہر گاؤں تک لے جانے کا عزم کیا۔ کانگریس نے بی جے پی اور آر ایس ایس پر منریگا کو ختم کرنے اور مزدوروں اور غریبوں کے حقوق کو پامال کرنے کی سازش کرنے کا بھی الزام لگایا۔کانگریس کے ضلع صدر ضیاء الرحمن نے کہا کہ بھارتیہ جنتا پارٹی اور مودی حکومت منریگا کو کمزور کرنے اور آہستہ آہستہ ختم کرنے کی سازش کر رہی ہے۔ انہوں نے کہا کہ منریگا ایک ایسا قانون ہے جو غریبوں اور مزدوروں کو روزگار، عزت اور حقوق فراہم کرتا ہے اور کانگریس اسے چھیننے کی کسی بھی کوشش کی اجازت نہیں دے گی۔ انہوں نے کہا کہ منریگا لاکھوں دیہی خاندانوں کو روزی روٹی فراہم کرتی ہے اور دیہی معیشت کی ریڑھ کی ہڈی ہے۔ کانگریس اس عوام دشمن پالیسی کے خلاف اپنی جمہوری اور پرامن جدوجہد کو جاری رکھے گی اور عوامی بیداری مہم کو تیز کرے گی۔منر یگا بچائو مہم کی کوآرڈینیٹر پرگیہ گوڑ، سابق ضلع صدر سبھاش گاندھی، منیش چترویدی، نریندر چودھری اور کشن چودھری نے کہا کہ بی جے پی مزدوروں کو ختم کرنے اور ملک میں سرمایہ داری لانا چاہتی ہے۔ منریگا کے تحت گاؤں کے سربراہوں کے حقوق کو ختم کرکے قانون کو کمزور کیا گیا ہے۔ضلع نائب صدر پرشانت والمیکی، نعیم منصوری، بھجن لال جاٹو، ساجد چودھری، اور ڈاکٹر عرفان نے کہا کہ منریگا نے گاؤں کے مزدوروں کو باوقار زندگی کا حق دیا اور انہیں معاشی طور پر بااختیار بنایا، لیکن مودی حکومت اسے کمزور کر رہی ہے۔ ان کا کہنا تھا کہ بی جے پی کا مقصد مزدوروں اور غریبوں کو کمزور کرکے ملک کو کمزور کرنا ہے۔کانگریس نے مودی حکومت سے منریگا کا نام تبدیل نہ کرنے، کم از کم اجرت کو 400 روپے تک بڑھانے، پنچایتوں کے حقوق بحال کرنے اور روزگار کی ضمانت دینے کا مطالبہ کیا۔